FLAMBOYAN PALEBAH JALAN KA LÉMBANG Bagéan ka-7 PENCOK HIRIS KANGGO EMA
FLAMBOYAN PALEBAH JALAN KA LÉMBANG
(Hariring Kuring Carita Urang)
(Hariring Kuring Carita Urang)
PENCOK HIRIS KANGGO EMA
(
Bagéan ka-7 )
Waktu kuring jeung Déman nepi ka panto hareup, Irén geus nungguan. Pok ngomong:”Ceu
ngerjakeun PR téh éngké balik sakola,nya?” Enya, ”témbal kuring.
Teu karasa bél
tandana bubaran sakola disada. Kuring jeung Irén
indit ka imah Irén.
“Tungguan di dieu sakeudeung!”ceuk Irén.
Kuring cicing handapeun flamboyan bari ningalikeun kandaraan nu lalar
liwat. Rupa-rupa mobil aralus pisan. Pating gurilap kacana katojo ku panon poé. Matak sérab ningalina. Motor pasiap-siap ngebut. Aya ogé
délman, malahan reg eureun. Tuluy kusirna ngomong:”Néng ka Lémbang?”Moal, Mang!” ”ceuk kuring bari mundur nyisi pisan.
Gék kuring diuk dina batu bari nyarandé kana tangkal flamboyan. Awak nu tadina hareudang
jadi rada tiis ayeuna mah. Kaiuhan , jeung hiliwirna angin matak seger.
“Ceu … Ceu … Ceu …!” Irén ngaguyahkeun. Kuring
reuwas rét ka Irén nu keur nyeungseurikeun. “Kalah
nundutan,” pokna deui. Atuda meni lila teuing, ”ceuk kuring. Lain Irén wungkul nu
nyengseurikeun téh, Déman ogé. Tapi Déman mah seurina rada dipégég. “Keur naon
Déman, ”ceuk Irén. “Nunggu seseorang,”ceuk Déman. “Someone, ni ye…!”ceuk Irén.
Irén malik ka tukang, euweuh sasaha. “Naha nya,
Ceu, Si Déman keur nunggu seseorang tapi geuning terus indit. Saya jadi curiga,
naha unggal Ceuceu geus balik, manehna balik? Naha Déman nunggu kamu, Ceu?
”ceuk Irén panasaran. “Kajeun teuing. Ti iraha Irén jadi détéktif? ”ceuk
kuring. “Ada aja,”jawab Irén bari seuri. “Nya ti
mimiti asup sakola atuh. Da Si Déman sok nangtung handapeun flamboyan
unggal poé. Lamun geus aya Ceuceu sok indit nuturkeun
tukangen Ceuceu," pokna deui, bari nyéréngéh.
Barang nepi kana téras imah, Irén tuluy mencét
bél. Teu lila panto aya nu muka. “Siang, Néng!” ceuk nu muka panto. “Euh
lila-lila teuing muka panto téh! Ieu geus lapar! ”ceuk Irén.
“Hayu ka jero, ”ceuk Irén ka kuring. Kuring
puluhak-polohok nempoan kaayaan di jero imah. Rupa-rupa lukisan aralus pisan.
Pot-pot karamik harérang pon kitu deui pakakasna. Gelas-gelas kaca, kekembangan
jeung sajabana.
“Sok diuk! ”ceuk Irén. Satengah ngarénjag
kuring bébéléhéman, asa éra parada. “Salsé
wé heueuh? Angguran urang dahar heula!”pokna deui. Kuring
unggeuk. Gék kuring diuk dina korsi anu hipu,
nyanghareupan méja anu buleud.
“Nginumna rék panas atawa tiis? ”ceuk Irén.
“Tiis wé,”témbal kuring.
“Bi, sadiakeun makan siang! ”ceuk Irén. Kurang
ti sapuluh menit dahareun geus sadia dina méja makan. Rupa-rupa kadaharan,
daging, sayur sop, jeung teuing naon deui , kuring teu apal ngaranna. Kuring
kumétap ningali daging hayam. Da jarang manggih
daging. Sapopoé ukur dahar lalab jeung sambel, kadang-kadang jeung lauk asin.
Kop kuring nyodok sangu saeutik bari
rada asa-asa. Sabada ngadoa dekul kuring dahar. Pingping hayam ampir satengahna
nu didahar. Barang rék dihuapkeun deui kadéngé aya nu
ngomong tarik semu ambek: “Irén, mana ayam Tétéh?!”Kuring reuwas bari muragkeun
pingping hayam nu rék digégél. Irén bangun nu reuwas kaciri beungeutna pias
jeung leungeunna semu ngadégdég. “Maap Tétéh, itu masih seueur!” walon Irén.
Téh Ira nyolongkrong kana piring wadah daging hayam bari mulak malik tumpukan
daging . Dina piring ngan aya dadana wungkul. Meureun Téh Ira palay tuang pingpingna.
Téh Ira neunggeul méja makam satarikna tuluy
ngaléos teuing ka mana.
“Hampura nya, Ceu? ”ceuk Irén semu
geumpeur. Irén mémérés dahareun nu mawur dina méja lantaran méjana diteunggeul
ku Tétéhna.
Teu nanaon,”ceuk kuring. Najan lapar kénéh kuring eureun dahar. Pingping hayam nu sabeulah
deui disimpen na wadah runtah bari dipelong ku kuring.
Kuring milu mérésan dahareun, jeung piring kotor disimpen ka dapur.
“Naha waka eunggeusan, sok dahar deui bisi can
wareg! ”ceuk Irén. Kuring gideug.
Kuring nyokot sabun rék ngumbah piring, ngan
kaburu dicarék ku Irén. Pokna:”Keun tong dikumbah éngké ku Bibi!” Kuring
tuluy ngumbah leungeun dina wastapel.
“Rén, balik ayeuna, nya?! ”ceuk kuring.
“Naha pan rék ngerjakeun PR babarengan.“Ema bisi
ngarep-ngarep, ”ceuk kuring. “Nya, atuh. Sing salamet,” ”ceuk Irén.
Irén nganteurkeun kuring nepi ka sisi jalan.
“Tuh geuning mobilna! ”ceuk Irén bari ngepeulan duit kana leungeun kuring.
“Nuhun, Rén, ”ceuk kuring bari dadah. Kuring tuluy naék kana mobil.
Dina mobil sirah karasa beurat, mikiran
kajadian bieu di imah Irén. Piceurikeun nu ti tadi ditahan-tahan teu kaampeuh.
Ahirna ting surungkuy tina juru mata. Sakapeung disusut ku saputangan.
Teu karasa mobil geus nepi ka gapura, reg mobil
eureun. Jut kuring turun bari bayar ongkos. “Ieu, Mang ongkosna, ”ceuk
kuring. Kénék kéképéhan embung narima. “Kanggo jajan
Eneng!” saur pa supir. “Tuh ceuk Emang gé teu kedah mayar,”ceuk kénék.
Kurang ti sapuluh menit, kuring nepi ka imah.
Panto pageuh kénéh tandana Ema can mulih. Kulutrak konci panto dibuka. Kalacat
naék kana golodog. Sup asup ka imah. Kuring salin baju. Tuluy ka goah mariksa
padaringan. Barang ditéang béas aya kénéh. Kuring reugreug , sabab teu kudu
nutu heula. Kuring ngulak béas saentik, tuluy
diisikan. Sanggeus ngisikan béas téh diliwet kana kastrol ambéh téréh asak
jeung hanetna lila.
Sabot nungguan liwet, kurah-koréh kana
téténong, geuning dengen sangu téh kosong. Ningali ka pipir sirung daun sampeu
gé pendék kénéh can saminggu diundeur.
Sanggeus liwet saat,tuluy suluhna dipulut.
Suluh nu seuneuan kénéh dikaluarkeun
sina pareum. Lawang hawu ditutup maké téréblék.
Kop kana boboko tukung, kencling kuring indit
ka pasir. Nepi ka pasir tuluy ngala hiris meunang satengah boboko tukung. Ampir
magrib kuring nepi ka imah. Liwet ditéang geus asak , tuluy nyiapkeun coét
jeung mutu. Hiris meunang mesék dikumpulkeun sikina dicampurkeun jeung nu rada
ngorana. Nu ngorana mah teu dipesék. Éta hiris dijieun pencok ku
kuring. Sangeus anggeus diasaan terus disimpen na lomari dapur.
Teu kungsi lila, torojol Ema mulih.
“Ceu…,Ceuceu…, tos uih?!”saur Ema bari mukakeun panto. Kuring unggeuk. Kaciri
pamenteu Ema marahmay. Ema lebet teras ngusapan sirah kuring.
“Tos nyangu?”saur Ema bari gap kana poci
nyicikeun cai.”Parantos, Ma,”témbal kuring.
Kuring ngamparkeun samak saheulay. Liwet dina
kastrol jeung pancok hiris dijagragkeun ka payunen Ema. “Mangga, Ma. Meungpeung hanet kénéh!”ceuk kuring bari nyodorkeun piring.
“Sok atuh bareng, Ceu! ”saur Ema bari nyodok sangu. “Atos, Ma, ”ceuk kuring.
”Iraha?” ”saur Ema. Tadi di bumi réréncangan, ”walon kuring. “Meureun di
babaturan mah réncangna sagala aya? ”saur Ema. Kuring unggeuk.
Dekul Ema tuang meni ponyo pisan. Cacakan
dengenna ngan pencok hiris wungkul. Bari seuhah Ema nyodok liwet deui. Dekul
deui tuang. Pencok hiris sacoét ampir séép sadayana ku Ema.
Tah, Ceu bérésan! ”saur Ema bari sibanyo dina
kobokan. Eureuleu Ema teurab. Alhamdulillah, nuhun Gusti,”saur Ema ngucap sukur
kanu Maha Agung.
Tétéla geuning kabagjaan téh aya di imah, aya
di dieu. Aya sagigireun Ema. Lain pédah sagala aya. Tapi aya kadeudeuh, kanyaah
Ema nu taya wates wangenna. Padahal kadaharan nu sapopoé ngan ukur saayana.
Lalab jeung sambel. Kadangkala asin. Pencok
hiris atawa karédok leunca mun pareng keur usum di kebonna. Manggih
daging téh taun kali kitu gé mun lebaran atawa mun aya nu hajat.
Hariring
Pencok Hiris Kanggo Ema
Sanajan
di batur harurung hérang
Jigana
ngahenang ngahening senang
Sandang,
pangan, papan, taya kakurang
Éta
kabéh ngan sangkaan urang
Ieu
pencok hiris kanggo Ema
Mugia
Ema ponyo tuangna
Hapunten
mung sakieu buktosna
Teu
ayeuna duh Ema sugan jaga
Sugan
jaga aya bagja urang
Bisa
sareng deui Ema tuang
Hirup
urang senang sasarengan
Dugi
ka dipundut ku Pangéran
Bérés salat isa, kuring uplek ngobrol
jeung Ema. Ema nanyakeun kaayaan di sakola. Kuring pon kitu deui nanyakeun
kaayaan Ema betah heunteuna cicing di dunungan. Bageur heunteuna dunungan Ema. Ahirna Ema lelenggutan tunduheun. Teras kulem tibra pisan di tengah imah. Ku kuring
dianggelan jeung disimbutan. Teu dipiwarang ka kamar da bisi gugah. Dug
kuring saré gigireun Ema.
Ampir kabeurangan hudang saré. Sakumaha biasa, enjing kénéh Ema angkat
didamel. Kuring indit ka sakola. Da sieun kabeurangan
mangkaning ti lembur ka Lémbang téh jauh ari leumpang mah. Asa lila sotéh
inditna. Asa sakeudeung balikna, balik sakola.
Slot Machine | Play Online - JtmHub
BalasHapusTry your luck 속초 출장마사지 at the right casino! Our 충주 출장마사지 slot machine game is simple and fun, with 춘천 출장샵 easy-to-use 경주 출장마사지 features and amazing bonuses. It is fast, 영천 출장마사지