sajak & puisi
2. (Senen, 15-07-2019)
DI PERTELON
Mangsa kalangkang sapanjang badan
Nitih wanci niat mahet jangji
Ngan hanjakal kahalang rasa hariwang
Pasini ingkar jiga poé nu kamari
Di pertelon jalan nu biasa
Kuring nungguan salila-lila
Unggal jalma ngaliwat ditanya
Sugan panggih jeung manéhna
Lalaunan langit robah warna
Tina biru kana oranye, jingga
Layung ngempur sampurna
Tapi tetep anjeun teu aya
Kuring mulang, ngaléngkahkeun suku
Panasaran ninggali ka tukang
Rentang-rentang anjeun datang
Kuring pinuh ku hanjelu
Hanjelu ningal anjeun réréndéngan
Bari jeung pacepeng-cepeng panangan
Anjeun mopohkeun jangji urang
Mun kitu kuring dianggap ilang
1. (10-7-2019)
KASURA
Kasura ku cucuk mah peurihna teu lila
Kasura ku beling mah peurihna leuheung
Kasura ku jarum mah aya eureunna
Kasura ku panah cinta tara sakeudeung
Kasura kitu salah kieu salah
Disuat pasti karasa nyeri
Teu disuat pon kitu deui
Nyeri ... peurih.... aduh alah
Kasura sok hemar hemir nyuatna
Padahal geus disuat mah sok longsong
Sanajan nyeri peurih rasana
Ibarat bucat bisul sok ngemplong
Ngemplong kasura ku seuseukeutan
Katingali nu kudu diturihna
Kitu gé mun seuseukeutanna beunang
Mun tinggaleun, bareuh ahirna
Geus disuat buburu diubaran
Lamun bareuh sok kamalangkem
Disuat bijil getil nanahan
Lamun cageur humapur ateul
Lain deui, lain deui ieung ....
Mun kasura ku panah cinta
Bisa édan jadi linglung, lieur ....
Kamana? Kumaha? Hese ngubaranana.
Rék disuat palebah mana nyuatna
Asa surser, pinuh sakujur badan
Panas tiris, teu puguh rarasaan
Nutug jajantung parat jero dada
Komentar
Posting Komentar