FLAMBOYAN PALEBAH JALAN KA LÉMBANG bagéan ka-1
FLAMBOYAN
PALEBAH JALAN KA LÉMBANG
(
Hariring Kuring Carita Urang )
Bagéan
ka-1
BAGJA CAMPUR TUNGGARA
Peuting harita pikeun kuring minangka
peuting nu éndah sakaligus peuting nu poék. Padahal bulan mah caang ngebrak,
ditarétés béntang-béntang. Rasa éndah lantaran isuk rék ngamimitian sakola,
ngan kasedih, kasusah, ngagulung asa baluweng.
Bisa asup ka SMA negeri ku kersana Gusti
nu Maha Suci. Cukang lantaran bibilintik ti SMP
kénéh sok dagang. Dagangan nu tatangga. Kayaning bala-bala, peucang (sampeu jeung
kacang), géhu, gegetuk, goréng ketan, jeung és. Méh unggal poé kuring mawa
dagangan ka sakola. Dagangan diwadahan kana baskom dituruban ku daun cau, ari
és mah kana térmos és paragina. Kuring ngélék baskom di belah kénca bari
nyoléndang kantong, térmos dijingjing di belah katuhu. Kuring teu ngarasa éra
mawa dagangan ka sakola. Baheula waktu keur sakola SD ogé, lamun geus balik ti
sakola sok dagang goreng kicimpring di
lapang bari lalajo maén bal.
Rét kana jam, geus peuting. Éma tos
mareuman lampu teras ka kamar. Apa ogé jigana tos tibra, teu humarurung baé.
Rada mending ayeuna mah, da tuang ogé tos kersaeun. Ngan teu acan tiasa calik,
da badé tuang ogé bari nyanda.
Hariring:
BAGJA CAMPUR TUNGGARA
Mungguhing
bulan cahyaan caang
Nanging
batin poék ku rupa-rupa hahalang
Geuning
kasusah teu weléh datang
Unggal
peuting ... unggal beurang
Sanajan
saliwat jiga marahmay
Padahal
gumbira bagja téh lugay
Hayang
kabagjaan terus nyampay
Nun Gusti mugia tunggara nyingray
Jalan
nu kamari asa ngimpi
Jalan
ayeuna asa sandiwara
Jalan
nu bakal can katingali
Sugan
tunggara jalanna bagja
Kuring lilir saméméh hayam kongkorongok.
Rét kana jam nu ngagantung dina bilik. “Ah peuting kénéh,” ceuk haté.
Dipeureum-peureum ogé panon teu daék tibra deui, da inget baé apan isuk-isuk
rék ngamimitian sakola.
Kuring hudang terus mariksa papakéan,
sapatu urut kelas tilu SMP , baju,
erok, topi, dasi, kabéhanana geus sadia bararesih. Kantong dibuka dipariksa
eusina. Buku anyar, pulpén anyar, pamupus anyar, jeung patlot anyar meunang
nyeukeutan. Ngan cepuk jeung kantong mah urut di SMP butut-butut ogé dioméan
lumayan tamba euweuh.
Jung nantung, samak saheulay urut saré
geuwat digulung, sup diasupkeun ka kolong méja. Simbut butut jeung bantal
disimpen luhureun lomari papakéan.
Barang nyingkabkeun rérégan samping
léréng, seuneu enyay-enyayan kaciri tina sela-sela bilik dapur. Barang
dideukeutan, geuning Ema nuju mirun seuneu badé naheur cai.
“Ceu, tos gugah?” saur Ema. “Muhun, Ma.
Apan supados jongjon ibakna ari poék kénéh
mah,” témbal kuring. “Enya, jung atuh kadé ati-ati bisi tijalikeuh éngké caina
ngéplok!” saur Ema. Kop kana émbér, gayung jeung wadah sabun. Anduk nu nyampay
didudut terus disampaykeun kana taktak.
Kuring mukakeun panto, masih kénéh
meredong kaayaan di luar. Bulan nu tadi
peuting ngebrak,kahalangan méga hideung.
“Ma,
poék geuning,” ceuk kuring. “Anteur ku Ema, nya?” saur Ema.”Wios wé, teu kedah.
Abdi badé ngabantun colén, ” témbal kuring. Gap kana colén nu aya di juru
dapur, terus disundut ku seuneu tina hawu.
“Tong katampian atuh poék kénéh mah.
Ka dinya wé ka MC ( Mandi Cuci ) ngarah
deukeut!” saur Ema. “Enya, Ma. Urang tingal heula heurin heunteu di jambanna,”
ceuk kuring. Da mémang ka tampian lebak mah jaba jauh téh, ari janari mah ongkoh
ibunna kandel. Upama aya angin nebak kana kakayon urang siga kahujanan ribeg. Komo
lamun peuting atawa soréna tas hujan , reumis, leueur, matak nyorodcod tuur
lamun keur mudun.
Barang ditingali, bener wé di MC
masih sepi kénéh. Kuring brus mandi. Réngsé mandi nandéan cai minuhan émbér.
Bray-bray rada caang. Kuring niup colén, tuluy
balik bari ngajingjing émbér nu pinuh ku cai.
Émbér diécagkeun dina golodog, terus
mukakeun panto. Kuring ngilikan badéng, tétéla badéng téh masih kosong. Cai
tina émbér dieurihkeun kana badéng. Terus indit deui ka MC bari mawa émbér dua,
ayeuna mah kénca katuhu. Da geus rada caang teu kudu mawa colén. Malah mah
tatangga ogé geus pada nyampak di MC. Aya
nu keur mandi, nyeuseuh, ngisikan jeung nu antri nandéan cai. Kuring gé
harita kudu ngantri nandéan cai.
Rasa kabungah campur jeung sedih.
Ari nu jadi sabab kuring geus bisa nulung ka indung nalang bapa. Najan ngan
saukur ngunjalan cai. Da anu biasa ngunjalan cai téh Apa sateu acan angkat ka
masjid. Pancén kuring mah gégéroh jeung nyangu, nyampakkeun Ema sareng Apa
upami tos mulih ti kebon.
Bérés minuhan badéng, kuring gégéroh,
tuluy sasapu. Sangu kaanggseu seungit tandana asak. Teu kungsi lila Ema
nyauran: “Ceu, Nyai ka dieu geura sasarap heula!”
Kuring jeung Si Nyai, sasarap. Si Nyai
tuluy ulin jeung babaturanana teuing ka mana. Kuring pamitan ka Ema sareng Apa.
Kuring tuluy indit ka sakola.
Selanjutnya Flamboyan palebah jalan ka
Lémbang bagian ke-2 / Salajengna
Flamboyan palebah jalan ka Lémbang bagéan
ka-2 : “POÉ MUNGGARAN SAKOLA”
Komentar
Posting Komentar